إعدام المطرب العراقي #صباح_السهل
اعتقل فجرا يوم الرابع من نيسان عام 1993
قامت زوجته الثانية بتسجيل صوتي له وهو يتحدث عن صدام وابناءه في غفلة منه وسرد كثير من الحقائق والأسماء، والتي عثر عليها في الأمر الإداري الخاص بإعدامه وكانت الخطة محكمة، كما يبدو، للإيقاع به وتوريطه وإعدامه من قبل زوجته الثانية الوكيلة بالمخابرات ، ورغم محاولته الدفاع عن نفسه امام المحقق أنه كان في حالة سكر وفقدان وعي وذكر أنه تبرع بدونم من الأرض للمعركة ضد ايران لكن توسلاته بطلب الرحمة من صدام حسين خطيا بائت بالرفض .
والغريب انه اكد بالتحقيق أن هذا الكلام تفوه به في بيته وأمام زوجته فقط ولمرة واحدة .
نص الوثيقة
كان التهجم على شخص الطا.غية يعدّ في عرف النظام السابق جريمة لاتغتفر، ومن الكبائر، التي تؤدي بصاحبها إلى حبل المشنقة، لذلك طويت صفحة الفنان السهل بشكل سريع وسهل أيضاً.
وعثر على التسجيل ضمن وثائق دعوى الاعدام.
وإليكم بعض ماتضمنه التسجيل الذي سجلته زوجته بصوت الفنان السهل وحسب ما مدون في ملف جهاز المخابرات:
عدي والفنانات العربيات
السهل: “من انتهت حفلة المطربة سيمون… الناس كلها تطلع من القاعة بعد انتهاء الحفلة، طالب القره غولي يقول لسيمون: اكعدي، تكله يابه ليش اكعد مو خلصت الحفلة أريد اروح. قال: عندنا أوامر أنتي تبقين، كلتله آني يااستاذ طالب هم ابقة ، فكال صباح انت مالك علاقة… اباوع فوك اشوف عدي والعصابة مالته فوك، اكو صالة فوك، الحماية نزلوا واخذوها… وحق هذا الماي، بس فلتت منهم وحدة، حتى ماجدة الرومي اخذوها، بس فلتت أمينة فاخت، انهزمت واخذت تكسي من الشارع وعافت فرقتها الموسيقية، هم جان عدي فوك وكال احجزوها، لكن أمينة فاخت شلعت!
زوجة السهل: آني ما اصدك معقولة ينزلون سمعة العراق لهاي الدرجة؟
السهل: وداعتج هي بالضبط ليش ما تصدكين، مو آني بالوسط الفني واعرف.
زوجته: يعني اكول معقولة سمعة ابوهم؟
السهل: ابوهم انكس منهم… ابوهم كله هنديات وفرنسيات، هذا صدام من يسكر يطلع الزباد من حلكه.
زوجته: منو؟
السهل: صدام حسين، وحق هاي النعمة، ما عنده غير السكر والبنات لعد شنو هذي الصورة، التي تشوفيها انت في التلفزيون والاعلام تختلف عن الحياة الطبيعية… هذا سعد نسيب ابو علي، هذا يكود لعدي، شكو بنات بالمعهد أو بالاكاديمية يجيبهم.. لعدي لعد شعبالج، وحق هذه النعمة… البارحة كدامي اجتني وحدة، كالتلي انت موصديق عدي… بنات ياخذوهن بالكوة، الكلية تمنح شهادات لو تطلع….. شلون احنا ندرس بالمعهد .
زوجته: ابوهم هم يسمع هيج يسوي ابنه؟
السهل: يسمع ابوهم ويدري بابنه، ويسكتله، قتل المرافق ما له، حنا الخادم اللي يشيل سترته ويداريه، كتله وعفه عنه، مو قتل كامل حنا، على اساس سجنه، كلاوات، بعدين وزارة العدل تطلب الرحمة من صدام حسين بخصوص عدي، شنو ها الكلاوات.
يقول السهل: رحت لتكريت أغني بحفلتين، رادوا يكتلوني آني وأمل خضير وسهام محمد، نجدة اجت حمتنا رادوا يخطفون أمل وسهام، اطفال بعمر 14 ـ 15سنة وصخين ، بايدهم مسدسات، و نيتهم ياخذوهن يغتصبوهن و صدام حسين اكبر كلاوجي وسختجي ميعرف باهلة هيج يسوون …. يغارون من كل الشعب ومن المحافظات .
ويكمل السهل، ولد خير الله طلفاح: “أكو واحد يحجي وياهم، بالنعال يضربون مدير التلفزيون ومدير الإذاعة”.
زوجته: معقولة ينزلون هل نزلة؟
السهل: معقولة شنو، انت شعبالج، هذوله سفلة كاولية، جان يدكون بالربابة، هذولة عصابة في الجعيفر والله اني مستعد ان #أعدم وأحجي هذا وأموت، احجي وارتاح، خلي يعدموني #روحي_كليلهم، وآني أواجه هذولة السفلة. انه موعندي علاقات ويه ناس بالمخابرات والقصر ويحجولي، حجي يخبل
من يسكر صدام يخر من حلقه الويسكي والزباد يطلع ، وجلساته بيها بنات هنديات واسبانيات وفرنسيات… وسوالف الله اكبر كلها كلاوات.
آخر الكلمات
صباح السهل: صدام حسين حقير، بس عدنان خير الله شريف، وان صدام اميركي ومتفق مع اسرائيل على ضرب النجف، خطة… اميركا واسرائيل هم اللي انطوا الحبل مثل ما انطوه الحبل وهجم على ايران. سبعاوي، هسه دكتور ومدير الأمن العامة وجان مدير مخابرات، وهو كان بنجرجي بتكريت، كلهم لا شهادة، ولاشيء… هذولة لازم يخلوهم في ساحة التحرير ويقطعونهم بمنشار كهربائي، معقولة الطماطة تصير 250 دينار وماكو
أبو اللحم عدي، وابو الدجاج عدي، والأراضي اخذها خير الله طلفاح واشتراها بالقوة.
وينتهي التسجيل لتقوم زوجته وكيلة المخابرات بتسليم التسجيل لمسؤولييها ويتم اعتقاله ليعدم بعد شهر وتصادر امواله المنقولة و غير المنقولة
#زمن_الطغيان